Trending
Hemen zaude:»»Ikasturte berria aurkeztu du Etxelilak; Eztabaida Gune Feminista izango da berritasunetako bat

Ikasturte berria aurkeztu du Etxelilak; Eztabaida Gune Feminista izango da berritasunetako bat

0
Berdintasuna

Etxelila Emakumin Topalekuaren 2020-2021 ikasturteko programazioa egoera berrira moldatuz, berrituta dator.Izan ere, ohiko Emakumeentzako Jabekuntza Eskolaz gain, Eztabaida Gune Feminista ere egongo da Etxelilan.

Hurrengo egunetan aurkeztuko da programa osoa. Aurten ere ikastaro ugari egongo dira hainbat gairekin lotuta, hala nola, feminismoarekin, emakumeen osasunarekin, kulturaren berdefinizioarekin eta emakumeen nortasunarekin.

EZTABAIDAGUNE FEMINISTA
Etxelilako eskaintza COVID-19ak eragindako errealitate berrira moldatzeko asmoz, ohiko Emakumeentzako Jabekuntza Eskolaz gain, jarduera irekiez osatutako proposamen bat prestatu da aurten: Eztabaida Gune Feminista. Honen helburua herritar guztiei zuzendutako jarduerak antolatzea da, aditu batek gidatuta, hausnarketa eta eztabaida feministak garatzeko espazio bat irekiz. Etxelilan egingo dira jarduera hauek, eta ez da beharrezkoa izango aurretiaz izena ematea. Adibidez:
  • Iraganeko eta gaur egungo sorgin ehizak.
  • Andrezaharren manifestua. Liburu aurkezpena eta solasaldia.

EMAKUMEENTZAKO JABEKUNTZA ESKOLA
Urtero legez,  feminismoarekin, emakumeen osasunarekin, kulturaren berdefinizioarekin eta emakumeen nortasunarekin lotutako hainbat ikastaro egongo dira aurten ere. Ikasturte hasieran egingo diren ikastaro batzuk:
  • Literatura tailerra: XIX. mende bukaeratik hasi eta gerra zibilera arteko garaiko ekarpen literarioak aztertu eta irakurriko ditugu. Garai loratsua izan zen emakumeentzat; unibertsitaterako aukera, bozka eskubidea, lan mundura sartzeko aukerak alde batetik eta momentuko aldaketa sozialak bestetik, XX. mende hasiera zirraragarria egin zuen. Aldaketa guzti hauek literaturan jasoak geratu dira eta idazleen eskutik egingo dugu Abangoardiaren ibilbidea.
  • Komunikaziorako plataforma digitaletan trebatuz:  Covid-19aren pandemiak aurrez aurrekoak ez diren komunikatzeko modu berriei atea zabaldu die, modu birtualean komunikatu behar izatea ekarri du, familiarekin, lagunekin, lanean… Ikastaro honetan komunikatzeko plataforma birtual erabilienak aztertuko dira. Eta bide batez, sare sozial orokor zabalduenak ere nola erabiltzen diren irakatsiko da, beti ere komunikazioa eta harremantzeko moduak ikuspegi feminista batetik abiatuta.
  • Covid-19. Aldaketa honen aurrean, orain zer?  COVID19k eragindako krisiak eragin zuzena du gure eguneroko bizitzan, gure pentsamenduetan, sentimenduetan eta egiteko moduetan. Ikastaro honetan aztertuko dugu nola kokatu emakume gisa krisi honen aurrean, nola jarri gure bizitzaren balioa erdigunean. Prozesu horretatik indarberrituta ateratzeko ariketak egingo ditugu gure bizipen eta gogoetetatik abiatuta, aukerak aztertzeko, erabakiak hartzeko eta haien garapena errazteko, gure banakako eta taldeko autozaintza sustatuz. Bidea elkarrekin egiteak eramangarriagoa egiten du! Animatuko zara?
PARTE HARTZE GUNE IREKIAK
Ondarroako Emakumeentzako Jabekuntza Eskolak ez du Eskola hutsa izan nahi, parte-hartze gunea baizik. Horregatik jarraian dituzuen parte-hartze guneak zabalduko ditugu eta horietan parte hartzera animatzen zaituztegu. Talde ireki horietan parte hartzeko interesa baduzu, Etxelilan eskatu informazioa.
  • Aringaingan
  • Literaturaz eztabaidatzeko gunea
  • Neska Gazteen Txokoa
  • Andrabanda Feminista

Bulegoa, zabalik. Zabalik dago Etxelilako bulegoa ere. Iraila amaitu arte goizez egongo da irekita, 10:00etatik 14:00etara. Etxelilaren jarduera guztietan unean uneko osasun protokoloak beteko dira, eta jarduerak ere protokolo horietara moldatuta egongo dira.

Elkarbanatu.

Egileari buruz

Lotutako artikuluak

Idatzi zure iruzkina