Maiatzetik aurrera hondakin organikoak biltzeko edukiontziak jarriko ditu Ondarroako Udalak, herritar guztiek hondakin organikoak birziklatzeko aukera izan dezaten. Modu horretan, orain arte erabili dugun edukiontzi grisa bi edukiontzirekin ordezkatuko da, erreusaren (errefusa) edukiontzia eta hondakin organikoak biltzeko edukiontzia. Sistema berriaren funtzionamenduaren inguruko azalpenak emateko eta herritarrek izan ditzaketen zalantzak argitzeko auzo batzarrak antolatu ditu Ondarroako Udalak.
Aste honetakoa bigarren batzarra izango da eta San Ignazio eta Alde Zaharreko auzokideei zuzenduta dago. Batzarra Otsailak 24an, barikua, 19:00etan izango da Kofradia Zaharreko 2.solairuan. Aurrerago ere falta diren herriko beste auzoguneei zuzendutako bilerak egiteko asmoa duela azaldu du Ondarroako Udalak. Udalarentzat garrantzitsua da herritarrek sistema berria ondo ulertzea eta horregatik beharrezkoak diren bilerak egiteko prest dago. ‘Ondarroan %30a baino ez dugu gaika biltzen kopurua azken urteetan igo bada ere, oraindik lortu behar ditugun helburuetatik urrun gaude’ azaldu du Zunbeltz Bedialauneta Ibaibarriaga herriko alkateak. Udalak funtzionamendu aldaketa honekin gaika jasotako hondakinen kopurua igotzea espero du.
